सुजन श्रेष्ठ
चौतारा | सिन्धुपाल्चोकका विभिन्न ग्रामीण क्षेत्रमा जङ्गली बदेलको आतंक बढ्दै जाँदा किसानहरू चिन्तित बनेका छन् । रातिको समयमा खेतबारीमा पस्ने बदेलले मकै, कोदो, आलु, तरकारी लगायतका बाली नष्ट गर्न थालेपछि किसानहरू समस्यामा परेका हुन् ।
स्थानीय किसानका अनुसार मेहनत गरेर लगाएको बाली बदेलले केही घण्टामै नष्ट गरिदिने गरेको छ । बदेलको डरले रातभर खेतबारी कुरेर बस्नुपर्ने अवस्था रहेको उनीहरू बताउँछन् । पछिल्ला वर्षहरूमा वन क्षेत्र नजिकका बस्तीमा बदेलको संख्या बढ्दै गएको र यसले कृषि उत्पादनमा प्रत्यक्ष असर परेको किसानहरूको गुनासो छ ।
किसानहरूले सम्बन्धित निकायसँग बदेल नियन्त्रण तथा बाली संरक्षणका लागि प्रभावकारी उपाय अपनाउन माग गरेका छन् । उनीहरूले विद्युतीय तारबार, बाली संरक्षण कार्यक्रम तथा क्षतिको उचित मूल्याङ्कन गरी राहतको व्यवस्था गर्नुपर्ने बताएका छन् ।
स्थानीय तहका जनप्रतिनिधिहरूले पनि किसानहरूको समस्या समाधानका लागि आवश्यक पहल भइरहेको बताएका छन् । यद्यपि, दीर्घकालीन रूपमा जङ्गली जनावरबाट हुने क्षति न्यूनीकरणका लागि समन्वित योजना आवश्यक रहेको सरोकारवालाहरूको भनाइ छ ।
बदेलको बढ्दो आतंकका कारण कृषि पेशाप्रति नै निराशा बढ्न थालेको भन्दै किसानहरूले समयमै प्रभावकारी कदम चाल्न सम्बन्धित निकायसँग आग्रह गरेका छन् ।
प्रतिक्रिया दिनुहोस्