सुजन श्रेष्ठ
सिन्धुपाल्चोक | सिन्धुपाल्चोकको बलेफी गाउँपालिका-१ थापागाउँ पहिरेमा पहिरोको जोखिम बढेपछि नौ परिवार राति विद्यालय भवनमा बस्न बाध्य भएका छन् । जमिन चिरिँदै र बिस्तारै तल सर्दै गएपछि स्थानीयले घरमा रात बिताउन जोखिमपूर्ण भएको बताएका छन् ।
करिब दुई महिनादेखि प्रभावित परिवारहरू राति विद्यालयमा बस्ने र दिनमा खेतीपाती तथा घरायसी कामका लागि घर फर्किने गरेका छन् । स्थानीय गणेशबहादुर थापाले घर र खेत दुवै असुरक्षित बन्दै गएको भन्दै तत्काल सुरक्षित स्थानमा पुनःस्थापना गर्न माग गरेका छन् ।
स्थानीयका अनुसार उक्त क्षेत्रमा सन् २०१४ देखि जमिन धसिन र चर्किन थालेको थियो । २०७२ सालको भूकम्पपछि समस्या थप गम्भीर बनेको उनीहरूको भनाइ छ । पहिरोका कारण नौ घर उच्च जोखिममा परेका छन् ।
बलेफी गाउँपालिकाले प्रभावित परिवारको अवस्था अध्ययन गरी तत्काल व्यवस्थापन र स्थानान्तरणका लागि माथिल्लो निकायमा निर्णय पठाएको जनाएको छ । स्थानीय जनप्रतिनिधिले पनि स्थायी समाधानका लागि पहल गर्ने बताएका छन् ।
यसैबीच, भोटेकोसी गाउँपालिका-१ का पाउँगुम्बा, हिन्दी, लिस्तीकोट, बोसिसा र नामानाङ क्षेत्रमा पनि ५१ परिवार अस्थिर पहिरोको जोखिममा रहेको स्थानीयले बताएका छन् ।
सिन्धुपाल्चोकमा यसअघि पनि पहिरोका कारण ठूलो मानवीय क्षति भएको छ । २०७७ सालमा लिदीमा पहिरोमा ३७ जनाको मृत्यु भएको थियो भने बाह्रबिसे क्षेत्रमा अर्को पहिरोमा १५ जनाले ज्यान गुमाएका थिए ।
स्थानीयको गुनासो छ-विपद्पछि राहत र पुनःस्थापनाका आश्वासन आउने गरे पनि जोखिममा रहेका बस्तीलाई समयमै सुरक्षित स्थानमा सार्ने काम प्रभावकारी हुन सकेको छैन । अहिले थापागाउँका परिवारको मुख्य माग एउटै छ-पहिरोले ठूलो क्षति गर्नुअघि नै सुरक्षित स्थानमा स्थायी पुनःस्थापना ।
स्रोत काठमाडौँ पोस्ट
प्रतिक्रिया दिनुहोस्