ओलम्पिक दिवस २०२६ को अवसरमा शुभकामना सन्देश

ओलम्पिक दिवस २०२६ को अवसरमा स्वदेश तथा विदेशमा रहनुभएका सम्पूर्ण नेपाली खेलप्रेमी, खेलाडी, प्रशिक्षक, खेलकर्मी, खेल प्रशासनसँग आबद्ध व्यक्तित्वहरू तथा खेलकुदको माध्यमबाट स्वस्थ र समुन्नत समाज निर्माणको अभियानमा समर्पित सम्पूर्ण महानुभावहरूमा हार्दिक शुभकामना व्यक्त गर्दछु ।
मानव सभ्यताको विकासक्रमसँगै खेलकुदले केवल शारीरिक तन्दुरुस्तीको माध्यमका रूपमा मात्र होइन, चरित्र निर्माण, अनुशासन, नेतृत्व क्षमता, सहिष्णुता र सामाजिक एकताको महत्वपूर्ण आधारका रूपमा आफ्नो विशिष्ट पहिचान स्थापित गरेको छ । बदलिँदो विश्व परिवेशमा खेलकुदले राष्ट्र र समुदायबीचको दूरी घटाउने, सांस्कृतिक विविधतालाई सम्मान गर्ने तथा साझा मानवीय मूल्यहरूको प्रवद्र्धन गर्ने प्रभावकारी माध्यमका रूपमा आफूलाई स्थापित गरेको छ । यही कारण ओलम्पिक आन्दोलनलाई विश्वव्यापी शान्ति, मित्रता र मानव एकताको अभियानका रूपमा पनि लिइन्छ ।
ओलम्पिक दिवस एउटा स्मरण दिवस मात्र होइन, यो सक्रिय जीवनशैली, स्वस्थ सोच र सकारात्मक सामाजिक रूपान्तरणतर्फ अग्रसर हुने प्रेरणाको दिन हो । यस वर्षको विश्वव्यापी सन्देश “You Can Do This! Let’s Move” ले प्रत्येक व्यक्तिलाई आफ्नो क्षमता पहिचान गर्दै सक्रिय र ऊर्जावान जीवनयापनतर्फ प्रेरित गर्दछ । आजको व्यस्त र प्रविधिमैत्री जीवनशैलीका कारण घट्दै गएको शारीरिक सक्रियताले विभिन्न स्वास्थ्य चुनौतीहरू सिर्जना गरिरहेको सन्दर्भमा यो सन्देश अझ सान्दर्भिक र महत्वपूर्ण बनेको छ ।

नेपालजस्तो युवा जनशक्ति सम्पन्न मुलुकका लागि खेलकुद मनोरञ्जन वा प्रतिस्पर्धाको विषय मात्र नभइ यो राष्ट्रिय गौरव, सामाजिक रूपान्तरण र समृद्धिको आधार पनि हो । खेलकुदले युवाहरूलाई सकारात्मक सोच, अनुशासित जीवन र सिर्जनात्मक ऊर्जातर्फ अभिमुख गराउँदै राष्ट्र निर्माणको अभियानमा सक्रिय सहभागिता जनाउन प्रेरित गर्दछ । त्यसैले खेल संस्कृतिको विकास, खेल पूर्वाधारको विस्तार र प्रतिभाको पहिचान तथा संरक्षण आजको आवश्यकता हो ।
ओलम्पिकका मूल आदर्श-मित्रता, सम्मान र उत्कृष्टतालाई आत्मसात गर्दै हामी सबैले खेलकुदलाई जीवनशैलीको अभिन्न अंग बनाउने, स्वस्थ समाज निर्माणमा योगदान पुर्याउने तथा आगामी पुस्तालाई खेलप्रति प्रेरित गर्ने संकल्प गर्न आवश्यक छ । खेलकुदले सिकाउने सहकार्य, धैर्यता र संघर्षको भावना जीवनका हरेक क्षेत्रमा उत्तिकै उपयोगी हुन्छन् ।
ओलम्पिक दिवस २०२६ ले हामी सबैमा नयाँ उत्साह, ऊर्जा र सकारात्मक सोचको सञ्चार गरोस् भन्ने शुभेच्छा व्यक्त गर्दै, खेलकुदमार्फत स्वस्थ, सक्षम, समावेशी र समुन्नत समाज निर्माणको साझा यात्रामा सबैको सक्रिय सहभागिताको अपेक्षा गर्दछु ।
ओलम्पिक दिवस २०२६ को हार्दिक मंगलमय शुभकामना ।