निशुल्क शिविरमा स्याउलेमा १९ जना, आरुबोटेमा १६ जनाको आँखामा मोतियाविन्दु भेटियो

चौतारा साँगाचोकगढी नगरपालिका स्वास्थ्य शाखाको आयोजनामा आइताबार पाठेघरको मुखको क्यान्सर सम्बन्धि प्रारम्भिक जाँच एवं मोतियाविन्दु (आँखा सम्बन्धि ) १ दिने स्वास्थ्य शिविर वडा नं १ स्थित स्याउले स्वास्थ्यचौकीमा भएको छ ।

उक्त शिविरमा १ सय ७८ जना वडाबासिहरुले सेवा लिएका छन् । जसमध्ये महिला १ सय ५५ जना र पुरुष २३ जना रहेका थिए ।
शिविरमा पाठेघरको मुखको क्यान्सर सम्बन्धि प्रारम्भिक जाँच ९१ जनाले गरेका थिए । भने १२ जना महिलाहरुमा आङ खस्ने समस्या देखिएको छ ।
आँखा परीक्षणमा १९ जनालाई मोतियाविन्दु भएको पाइएको जनस्वास्थ्य अधिकृत दिनेश नेपालले जानकारी दिनुभयो । यीमध्ये पनि ६ जनाको दुवै आँखामा मोतियाविन्दु भएको पाइएको नेपालले बताए ।
आरुबोटेमा पनि निशुल्क आँखा शिविर

चौतारा साँगाचोक गढी नगरपालिका वडा नं ७, आरुबोटेमा ५० जनाको आँखा परिक्षण गरिएको छ । तामाङ समुदायको बाक्लो बस्ति रहेको यस गाउँमा १६ जनाको आँखामा मोतियाविन्दु भएको पाइएको छ । उनिहरुलाई आइताबार नगरपालिकाको स्वास्थ्यकर्मीहरुले घर आँगनमाने पुगेर सेवा दिएका थिए । साथै शिविरमा सुगर, प्रेसर जाँच पनि गरिएको थियो ।

आफ्नै घरआगनमा आँखा परिक्षण गर्न पाउदा स्थानिय खुशि भएका छन् । फागुन १५ गतेदेखि क्रमश प्रत्येक वडाको तोकिएको स्वास्थ्य संस्थाहरुमा निशुल्क स्वास्थ्य परिक्षण शिविर सञ्चालन भइरहेको छ ।
चौतारा साँगाचोकगढी नगरपालिकाका मेयर कृष्ण प्रसाद सापकोटाले मोतियाविन्दु भएकाहरुलाई नगरपालिकाले आयोजना गर्न लागेको निशुल्क मोतियाविन्दु शल्यक्रिया शिविरमा सेवा लिन आग्रह गरे ।

शिविरमा पहिचान भएका मोतियाविन्दु विरामीहरुलाई नगरपालिकाको आयोजना र नेपाल आँखा अस्पताल त्रिपुरेश्वरको प्राविधिक सहयोगमा फागुन २०,२१ र २२ गते निशुल्क शल्यक्रिया गरिने मेयर सापकोटाले बताए ।