जुगल खबर
सिन्धुपाल्चोक | लामो समय फुटबल मैदानमा रेफ्रीको सिठी बजाउँदै आएका राजेश राउत अहिले समाजमा परिवर्तनको आवाज उठाउने संकल्पसहित नयाँ यात्रामा निस्किएका छन् । खेलमैदानमा अनुशासन र निष्पक्षताको प्रतीक मानिने सिठी बजाउने उनको हात अब सामाजिक रूपान्तरणको अभियानमा सक्रिय बनेको छ ।
खेलमैदानमा रेफ्रीको भूमिका निर्वाह गर्दा उनले अनुशासन, निष्पक्षता र जिम्मेवारीको महत्त्व नजिकबाट बुझे । एउटा खेल सफल बनाउन जसरी नियमको पालना र सन्तुलित निर्णय आवश्यक हुन्छ, त्यसैगरी समाज अघि बढाउन पनि इमानदारी र उत्तरदायित्व अपरिहार्य हुन्छ भन्ने सिकाइ उनले मैदानबाटै पाएका हुन्। तर उनको यात्रा मैदानको सीमामा मात्र सीमित रहेन । मैदानमा नियम र अनुशासन कायम गरेका उनी अब समाजमा नयाँ सोच, नयाँ योजना र सकारात्मक सम्भावनाको पक्षमा सक्रिय छन् ।
यसै क्रममा राउत नेपाली कांग्रेसको १५औँ महाधिवेशनअन्तर्गत सिन्धुपाल्चोक क्षेत्र नं. १ बाट ३५ वर्षमुनिको युवा कोटातर्फ महाधिवेशन प्रतिनिधि पदका उम्मेदवार बनेका छन् । फुटबल मैदानको अनुभव, सामाजिक यात्राको सिकाइ र युवाप्रतिको जिम्मेवारीलाई आत्मसात् गर्दै उनी उम्मेदवारी लिएर अघि आएका हुन् ।
युवाहरू केवल भविष्यका कर्णधार मात्र नभई वर्तमानका परिवर्तनकारी शक्ति पनि हुन् भन्ने उनको दृढ विश्वास छ। “समाज परिवर्तनका लागि सपना देखेर मात्र पुग्दैन, त्यसका लागि सोच, साहस, जिम्मेवारी र कर्म आवश्यक हुन्छ” भन्ने मान्यता राख्दै उनले सामाजिक सेवा, युवा सहभागिता र संगठनात्मक यात्रामा निरन्तरता दिँदै आएका छन्। उनका अनुसार युवाको ऊर्जा र सोचलाई सही दिशामा परिचालन गर्न सकियो भने समाजमा ठोस परिवर्तन सम्भव छ ।
राउतले आफ्नो उम्मेदवारीमार्फत रेफ्रीको भूमिका मैदानमा मात्र होइन, समाजको सकारात्मक रूपान्तरणमा पनि युवाले नेतृत्वदायी भूमिका निर्वाह गर्न सक्छन् भन्ने उदाहरण प्रस्तुत गर्न चाहेको बताएका छन्। पार्टीभित्र युवाको आवाज सशक्त बनाउँदै नयाँ पुस्तालाई निर्णय प्रक्रियामा सहभागी गराउनुपर्ने उनको जोड छ ।
आफ्नो अभियानको मर्मलाई उनले यसरी व्यक्त गरेका छन्:
सिन्धुपाल्चोकका युवाहरूबीच उनको यो यात्रा सकारात्मक चर्चाको विषय बनेको छ। खेलमैदानदेखि सामाजिक क्षेत्रसम्मको अनुभव बोकेका राउतले आफ्नो उम्मेदवारीलाई युवाको यात्रा र सामाजिक परिवर्तनको संकल्पका रूपमा अघि बढाएका छन् ।
युवाको यात्रा, सामाजिक परिवर्तनको संकल्प
प्रतिक्रिया दिनुहोस्