कोदारी राजमार्ग सञ्चालनमा इकु पहिरो बाधक, चार दिनदेखि अवरुद्ध छ सडक

यो क्षेत्र चीनको स्वशासित क्षेत्र तिब्बतसँग सीमा जोडिएको तातोपानी नाकानजिक पर्छ । इकु पहिरो खसिरहने हुँदा तातोपानी नाकाबाट आएका मालवाहक कन्टेनर रोकिएका छन् । चीनसँगको व्यापारमा असर पुगिरहेको छ । नियमित सञ्चालनका लागि सडक विभाग निरन्तर लागिरहेको डिभिजन प्रमुख अमित श्रेष्ठले जानकारी दिए । उनले दिनरात सडक खुलाउने प्रयास भइरहेको सुनाए ।

इकु पहिरो पन्छाउन र भासिएको स्थान उठाउन नसक्दा चार दिन बित्दासमेत राजमार्ग नखुलेको हो । इकु पहिरो झरिरहने समस्यासँगै अर्कोतर्फ सोही पहिरोमुनि रहेको भोटेकोशी नदीको बहाबले सडकलाई तानिरहेको छ । नदीले तानेर भासिएको सडक उठाउन सडक डिभिजन कार्यालयले हैरानी बेहोरिरहेको छ । दिनहुँ खस्ने पहिरोले कन्टेनर मात्रै होइन, बिरामी बोक्ने एम्बुलेन्सलगायतका अत्यावश्यक सवारीसाधन पनि रोकिनु परेको छ ।
सडक अवरुद्ध हुँदा तातोपानी नाकाबाट भन्सार प्रक्रियाका लागि उताबाट छुटेका दर्जनौँ कन्टेनर खासा, लिपिङमा रोकिँदै आएका छन् ।