सुजन श्रेष्ठ
गणतन्त्र दिवस २०८२ को अवसरमा बागमती प्रदेश सरकारले विभिन्न क्षेत्रका पत्रकार तथा सर्जकहरूलाई सम्मानसहित पुरस्कार प्रदान गरेको छ। प्रदेश सरकारले पत्रकारिताको सात विधामा योगदान पुर्याएका पत्रकारहरूलाई पुरस्कृत गरेको हो। अग्रज सम्मान पत्रकारिता पुरस्कार मकवानपुरका प्रताप बिष्टलाई प्रदान गरिएको छ भने बागमती पत्रकारिता पुरस्कार काठमाडौंका कुमारभक्त रञ्जितकारलाई दिइएको छ, जसले नेपालमा भाषामा समाचार तथा कार्यक्रम सञ्चालनमा उल्लेखनीय योगदान पुर्याएका छन्। संस्थागत पत्रकारिता पुरस्कार नेपाल पत्रकार महासंघ बागमती प्रदेशका १३ जिल्लामध्ये एक मात्र निर्वाचित जिल्ला अध्यक्ष शोभा अर्याललाई प्रदान गरिएको छ। ग्रामिण पत्रकारिता पुरस्कार धादिङका नवराज छत्कुली, विकास पत्रकारिता पुरस्कार गोरखापत्र दैनिकमा चेपाङ भाषा सम्पादनमा सक्रिय चितवनका नेपोलियन चेपाङ, प्रदेश गौरव पत्रकारिता पुरस्कार सिन्धुपाल्चोकमा तामाङ भाषामा समाचार सम्पादनमा संलग्न कमला तामाङ (अस्मि स्याङतान तामाङ), र युवा पत्रकारिता पुरस्कार नुवाकोटका रामचन्द्र अर्याललाई प्रदान गरिएको छ।
चलचित्रतर्फ, बागमती चलचित्र पुरस्कार काठमाडौंका मनोजकुमार केसीले प्राप्त गरे भने साहसिक चलचित्र पुरस्कार काठमाडौंका अर्जुन कार्कीलाई प्रदान गरिएको छ। कार्कीले सगरमाथाको चुचुरोमा १ मिनेट १० सेकेन्ड शिर्षासन गरेर विश्व कीर्तिमान कायम गर्नुका साथै डेढ दर्जनभन्दा बढी चलचित्रमा अभिनय गरेका छन्। सञ्चार रजिष्ट्रारको कार्यालयद्वारा आयोजित चलचित्र पटकथा लेखन कार्यशालामा सहभागी २० जनामध्ये सात जनाले निर्माण गरेका लघु चलचित्रमध्ये उत्कृष्ट सर्जकहरूलाई पनि पुरस्कृत गरिएको छ। चितवनका अशोक पाठक प्रथम, दोलखाकी उषा अधिकारी द्वितीय, र काठमाडौंका दिप्नेश श्रेष्ठ तृतीय भएका छन्। त्यस्तै, सान्त्वना पुरस्कार चितवनका प्रेम प्रसाद सापकोटा र काठमाडौंका गोपाल थापाले प्राप्त गरेका छन्।
लघु चलचित्र तथा वृत्तचित्र निर्माणमा योगदान पुर्याएका प्रदीप पाण्डे, गणेश खडका, गृष्ठ श्रेष्ठ, एबिन्द्र मादेन लिम्बु, शिव पुरी, प्रभाकर देव शर्मा र दीपक कुमार घिमिरेलाई प्रशंसा पत्र प्रदान गरिएको छ। हेटौंडामा सम्पन्न भएको गणतन्त्र दिवसको मूल समारोहमा प्रदेश प्रमुख दीपक प्रसाद देवकोटाले सम्मान तथा प्रशंसा पत्र वितरण गरेका थिए भने मुख्यमन्त्री बहादुरसिंह लामा (तामाङ)ले दोसल्ला र आन्तरिक मामिला तथा कानून मन्त्री सुरजचन्द्र लामिछानेले नगद पुरस्कार प्रदान गरेका थिए। कार्यक्रममा लघु चलचित्र तथा वृत्तचित्रको विशेष प्रदर्शन गरिएको थियो, जसलाई सन्देशमूलक रहेको भन्दै प्रदेश प्रमुख देवकोटाले सकारात्मक प्रतिक्रिया व्यक्त गरेका छन्।
प्रतिक्रिया दिनुहोस्