सुजन श्रेष्ठ
सिन्धुपाल्चोक — काभ्रेपलाञ्चोकस्थित कृषि विकास कार्यालय, चौतारा साँगाचोकगढी नगरपालिका र कफी सहकारी संघ सिन्धुपाल्चोकबीच वडा नं. १० मा सञ्चालन भइरहेको कफी पकेट प्रवर्द्धन कार्यक्रमको दोस्रो वर्षका लागि सम्झौता सम्पन्न भएको छ । पाँच वर्षे अवधिको यस कार्यक्रम अन्तर्गत कफी उत्पादन वृद्धि तथा किसानको आयस्तर सुधार गर्ने लक्ष्य राखिएको छ ।
सम्झौताअनुसार कार्यक्रमको लागत साझेदारी बागमती प्रदेश सरकारको ६० प्रतिशत, नगरपालिकाको २० प्रतिशत र किसानको २० प्रतिशत रहनेछ । सरोकारवालाहरूले यसलाई सामान्य योजना नभई कृषिमा रूपान्तरण ल्याउने महत्वाकांक्षी कार्यक्रमको रूपमा लिएका छन् ।
कार्यक्रममार्फत कफी खेतीको विस्तार, उत्पादनमा वृद्धि तथा गुणस्तर सुधार गर्दै बजारको बढ्दो मागलाई सम्बोधन गर्ने अपेक्षा गरिएको छ । पछिल्लो समय आन्तरिक तथा बाह्य बजारमा कफीको माग तीव्र रूपमा बढ्दै गएको सन्दर्भमा उत्पादन वृद्धि अपरिहार्य देखिएको छ ।
कृषि क्षेत्रमा आत्मनिर्भर बन्ने अभियानमा किसानको सक्रिय सहभागिता अपरिहार्य रहेको उल्लेख गर्दै सम्बन्धित पक्षहरूले किसानको भूमिका नै कार्यक्रम सफलताको मुख्य आधार हुने बताएका छन् ।
प्रतिक्रिया दिनुहोस्