जुगल खबर
सिन्धुपाल्चोक – भारतको गुरुग्रामबाट सिन्धुपाल्चोक इन्द्रावती गाउँपालिका वडा नम्बर–४, टाकुरेका ४४ वर्षीय सोमबहादुर तामाङ बेपत्ता भएका छन् ।
छोरीलाई भेट्न तथा रोजगारीको सिलसिलामा गुरुग्राम पुगेका तामाङ डिसेम्बर १५ तारिखदेखि सम्पर्कविहीन भएको परिवारले जनाएको छ । छोरी पन्जु तामाङका अनुसार उक्त दिन बिहान बुवा आफू बस्दै आएको कोठामा नदेखिएपछि खोजी कार्य सुरु गरिएको हो ।
बुवा हराएपछि पन्जु तामाङ गुरुग्रामका विभिन्न गल्ली–गल्लीमा धाउँदै खोजीमा जुटिरहेकी छन् । लामो समयसम्म खोजी गर्दा पनि बुवाको पत्ता नलागेपछि उनले सामाजिक सञ्जालमार्फत भिडियो सार्वजनिक गर्दै बुवाको खोजीका लागि सहयोगको अपिल गरेकी छिन् ।
पन्जु तामाङले गुरुग्रामको सेक्टर १७–१८ स्थित प्रहरी चौकीमा उजुरी समेत दिएकी छन् । तर उजुरी दिएपनि अहिलेसम्म बुवाको अवस्था पत्ता नलागेपछि उनले गुरुग्राम वरपर रहेका नेपाली समुदाय, संघ–संस्था तथा व्यक्तिहरूलाई खोजी कार्यमा सहयोग गर्न आग्रह गरेकी छन् ।
मानसिक सन्तुलन पूर्ण रूपमा ठिक नभएकाले बुवा आफ्नै कोठाबाट बेसुरमा निस्किएको हुन सक्ने आशंका छोरी पन्जु तामाङले व्यक्त गरेकी छन् । बेपत्ता सोमबहादुर तामाङको खोजीमा परिवारले सबैसँग सहयोगको अपिल गरेको छ ।
हर समयबाट
प्रतिक्रिया दिनुहोस्