जुगल खबर
सिन्धुपाल्चोक । नेपाली कांग्रेसका केन्द्रीय सदस्य तथा पूर्व स्वास्थ्य तथा जनसङ्ख्या मन्त्री मोहनबहादुर बस्नेतलाई सिन्धुपाल्चोक क्षेत्र नं. १ बाट प्रतिनिधि सभाका लागि एकल सिफारिस गरिएको अवस्थामा पार्टीभित्रै युवा पुस्ताले शक्तिशाली हस्तक्षेप गरेको छ। बहालवाला मन्त्री तथा केन्द्रीय सदस्यसमेत रहेर लामो समयदेखि प्रभाव जमाइरहेका बस्नेतलाई चुनौती दिँदै नेपाल विद्यार्थी सङ्घका केन्द्रीय सदस्यहरू हेमन्त श्रेष्ठ र साजन तामाङले हिजो सम्पन्न जिल्ला कार्य समिति पूर्ण बैठकमा आफ्नो उम्मेदवारी घोषणा गरेपछि कांग्रेस सिन्धुपाल्चोकमा नयाँ–पुरानो पुस्ताबीचको राजनीतिक टकराव सतहमा आएको छ।
पछिल्लो समय देशभर फैलिएको भ्रष्टाचार र बेथितिविरुद्धको ‘जेन–जी’ (Gen Z) आन्दोलनको प्रभाव अहिले दलहरूको आन्तरिक राजनीतिमा समेत देखिन थालेको छ। युवा नेताहरूको यो घोषणालाई परम्परागत राजनीतिको निरन्तरतामाथि उठेको बलियो प्रश्न र परिवर्तनको तीव्र आकाङ्क्षा रूपमा विश्लेषण गरिएको छ।
लामो समयदेखि एउटै नेतामै केन्द्रित रहँदै आएको राजनीतिक नेतृत्वलाई चुनौती दिने उद्देश्यले युवाहरूले यो कदम चालेका हुन् भन्ने बुझिन्छ। उनीहरू ‘पहुँच’भन्दा ‘योग्यता’ र ‘नेतृत्व हस्तान्तरण’लाई प्राथमिकता दिनुपर्छ भन्ने पक्षमा छन्। यसैबीच, मोहनबहादुर बस्नेतमाथि टेरामक्स प्रकरणमा अख्तियार दुरुपयोग अनुसन्धान आयोगले भ्रष्टाचार मुद्दा दायर गरेपछि उनको वैधानिकता र नैतिक आधारमाथि समेत प्रश्न उठेको छ। युवा उम्मेदवारहरूको घोषणाले पार्टी नेतृत्वलाई यस्ता विवादित नेतालाई पुनः अवसर दिने विषयमा पुनर्विचार गर्न दबाब बढाएको छ।
युवाहरूको यस कदमले जिल्ला कांग्रेसभित्रको गुटगत समीकरणमा पनि प्रभाव पार्ने निश्चित मानिन्छ। बस्नेत–इतर समूहले युवाप्रति समर्थन जनाउने सम्भावना बढेको छ।
एकल सिफारिस भए पनि जिल्लाबाटै उठेको सशक्त युवा आवाजपछि पार्टी नेतृत्व ‘एकल निर्णय’ पर्याप्त नहुने निष्कर्षमा पुग्न बाध्य हुने देखिन्छ। सिन्धुपाल्चोकको यो घटनाले नेपाली कांग्रेसले युवालाई प्रोत्साहन गर्ने र लोकतान्त्रिक अभ्यासलाई मजबुत बनाउने आफ्नो नीतिलाई कति इमानदार रूपमा लागू गर्छ भन्ने प्रश्न पनि उठाएको छ।
अब सिन्धुपाल्चोक–१ मा अनुभवी नेता मोहनबहादुर बस्नेतको नेतृत्व र युवा नेता हेमन्त श्रेष्ठ तथा साजन तामाङको परिवर्तनको ऊर्जा तथा आकाङ्क्षाबीचको प्रतिस्पर्धाले आगामी निर्वाचनको माहोललाई झनै रोचक बनाउनेछ। यद्यपि उम्मेदवारीको अन्तिम निर्णय कांग्रेसको केन्द्रीय संसदीय समितिले गर्नेछ, तर जिल्लाबाट उठेको यो विद्रोहलाई केन्द्रले सजिलै पन्छाउन सक्ने अवस्था भने छैन।
प्रतिक्रिया दिनुहोस्