जुगल खबर
सिन्धुपाल्चोक — चौतारा साँगाचोकगढी नगरपालिका–१३, ठूलोसिरुवारीमा अवस्थित आलोपालो अग्रसर बहुउद्देश्यीय सहकारी संस्था लिमिटेडले आफ्नो १२औं वार्षिक साधारणसभा आज सम्पन्न गरेको छ। नर्सिङडाँडास्थित सहकारीको आफ्नै सभाहलमा सम्पन्न कार्यक्रममा बागमती प्रदेश सभा सदस्य तथा पूर्व मन्त्री युवराज दुलाल प्रमुख अतिथि रहेका थिए भने चौतारा साँगाचोकगढी नगरपालिकाका सामाजिक विकास समितिका संयोजक तथा वडा नं. १३ का वडा अध्यक्ष रामप्रसाद गौतम विशेष अतिथिको रूपमा सहभागी थिए।
साधारणसभाको उद्घाटनपछि सम्बोधन गर्दै प्रदेश सांसद दुलालले आलोपालो सहकारीले सहकारीका मूल्य–मान्यता अनुसार गतिविधि सञ्चालन गरी जनविश्वास हासिल गरेको बताए। उनले सहकारीको लक्ष्य अझ टाढा रहेको उल्लेख गर्दै सदस्यहरुलाई अझ उत्पादनमुखी र उपलब्धिमूलक कामतर्फ लाग्न आग्रह गरे। दुलालले सहकारीले जनतालाई आर्थिक रूपमा सबल र आत्मनिर्भर बनाउन ठूलो योगदान दिइरहेको भन्दै सदस्यहरुलाई बढी सेयर किन्न र मुनाफामा सहभागी हुन सुझाव दिए।
दुलालले देश बिग्रनुमा असल राजनीतिज्ञ र स्वार्थी राजनीतिमा लाग्नेबीचको भिन्नता नचिनिनु कारण भएको टिप्पणी गर्दै, असल मानिसलाई जिताएर पठाए नीति निर्माण सन्तुलित र जनमुखी हुने विश्वास व्यक्त गरे।
विशेष अतिथि वडा अध्यक्ष गौतमले आलोपालो सहकारीलाई नगरकै उत्कृष्ट सहकारी之一का रूपमा वर्णन गर्दै, सदस्यहरुलाई ढुक्क भएर बचत गर्न आग्रह गरे। उनले सहकारीले किसानलाई नगदेबाली खेतीतर्फ प्रोत्साहित गर्नुपर्नेमा जोड दिए। गौतमले सहकारी भवन निर्माणका लागि सांसद दुलालको कोषबाट प्राप्त बजेटप्रति आभार व्यक्त गर्दै, साना किसान कृषि सहकारीको भवन निर्माणका लागि पनि सहयोगको आग्रह गरे।
कार्यक्रममा सेतीदेवी माध्यमिक विद्यालय व्यवस्थापन समितिका अध्यक्ष कुलप्रसाद दाहाल, साना किसान कृषि सहकारीका अध्यक्ष होमनाथ चौलागाई लगायतले शुभकामना मन्तव्य दिएका थिए।
कार्यक्रमका अवसरमा असल ऋणी तथा उत्कृष्ट बचतकर्ताहरुलाई सम्मान गरिएको थियो। सम्मानित असल ऋणीहरु किसनबहादुर गिरी, रबिना तामाङ, रेशमबहादुर श्रेष्ठ र संगीता लामिछाने रहेका छन् ।
उत्कृष्ट बचतकर्ताहरु सेतु पुरी, सोमबहादुर तामाङ, काली गिरी, अन्जु माया श्रेष्ठ, तेजकुमारी दुलाल, रिता श्रेष्ठ, अनिश सुवेदी, सुशिला गहतराज, मन्दिरा गिरी, गोमा ढुंगेल र मिना श्रेष्ठ रहेका छन् ।
त्यस्तै, गत वर्ष एसइई परीक्षामा उत्कृष्ट अंक ल्याउने सेतीदेवी माध्यमिक विद्यालयबाटस् रिकेश बुढाथोकी , अस्मिता चौलागाई , प्रशान्त पुरी र मिनिशा गौतम
कुन्डलादेवी विद्यालयबाट शान्ति दुलाल प्रशान्त रानालाई नगदसहित सम्मान गरिएको थियो।
सहकारीका महाप्रबन्धक सन्तोष गिरीका अनुसार सहकारीले दुग्ध उत्पादन गर्ने किसानलाई नगरपालिका मार्फत प्राप्त अनुदान रकम वितरण गरेको र सांस्कृतिक समूहहरुलाई मायाको चिनो प्रदान गरेको थियो।
सहकारीका अध्यक्ष नारायण प्रसाद गौतमले आ.व. ०८१/८२ को प्रगति प्रतिवेदन र भावी कार्ययोजना प्रस्तुत गरेका थिए भने कोषाध्यक्ष हरिबहादुर नेपालले वार्षिक प्रतिवेदन पेश गरी सभाबाट पारित गरिएको थियो। यस वर्ष सहकारीले शेयर सदस्यहरुलाई १० प्रतिशत लाभांश वितरण गर्ने निर्णय गरेको छ।
२०७० साल पौष १९ गते २५ जना संस्थापक सदस्यले प्रति व्यक्ति २५ हजार रुपैयाँका दरले जम्मा ६ लाख २५ हजार रुपैयाँ पूँजीका साथ स्थापना गरिएको आलोपालो सहकारीले छोटो अवधिमै ६ करोड रुपैयाँभन्दा बढी कारोबार गर्ने हैसियत हासिल गरेको छ।
भावी योजनाअनुसार सहकारीले कृषि र पशुपालनलाई प्राथमिकता दिँदै स्थानीय उत्पादनलाई बजारमा जोड्ने, कृषक सदस्यहरुलाई आवश्यक मल, बीउ, उपकरण र किटनाशक औषधि सहकारीमार्फत उपलब्ध गराउने, र स्थानीय तहसँग समन्वय गरी आत्मनिर्भर वडा निर्माण गर्ने नीति लिएको छ।
आलोपालो अग्रसर बहुउद्देश्यीय सहकारी संस्था सिन्धुपाल्चोकका सयौं सहकारीमध्ये “१८ उत्कृष्ट सहकारी” कारूपमा छनोट भएको थियो।
-रेडियो सिन्धुबाट
प्रतिक्रिया दिनुहोस्