सुजन श्रेष्ठ
नेपाल विद्युत् प्राधिकरणका पूर्व कार्यकारी निर्देशक कुलमान घिसिङ करिब एक महिना लामो अमेरिका तथा युरोप भ्रमण सम्पन्न गरी नेपाल फर्किएका छन् । “उज्यालो नेपाल अभियान”लाई अन्तर्राष्ट्रिय स्तरमा प्रचार–प्रसार गर्ने उद्देश्यले गरिएको उक्त भ्रमणमा उनले प्रवासी नेपाली समुदाय, वैज्ञानिक, व्यवसायी, विद्यार्थी र अभियन्ताहरूसँग प्रत्यक्ष संवाद गरेका थिए ।
भ्रमणका क्रममा विभिन्न कार्यक्रम तथा अन्तरक्रियामा सहभागी भएका घिसिङले प्रवासी नेपाली समाजबाट पाएको साथ र समर्थनले आफू अत्यन्तै उत्साहित भएको बताए । उनले न्यूयोर्कमा ‘हामी नेपाली ग्लोबल’बाट प्राप्त ‘ग्लोबल हिरो अवार्ड’, अमेरिकन सोसाइटी अफ नेपालिज इन्जिनियर्स एशोसिएसनको प्रमुख वक्ताको भूमिका, तमुधिं युके र एनआरएनए युके लगायत संघसंस्थाबाट पाएको सम्मानलाई “उज्यालो नेपाल अभियान”प्रतिको विश्वासको अभिव्यक्ति भएको उल्लेख गरे ।
यस्तै, बेल्जियम, पोर्चुगल, माल्टा, नेदरल्याण्ड्स, लक्जेमबर्ग, स्कटल्याण्डलगायत मुलुकमा रहेका प्रवासी नेपाली संघ–संस्थासँगको भेटघाट तथा अन्तरक्रियाले अभियानलाई अझ सशक्त बनाउन प्रेरणा मिलेको उनले बताए । हार्वर्ड, एमआइटी जस्ता विश्वप्रसिद्ध विश्वविद्यालयमा कार्यरत नेपाली वैज्ञानिक, प्राध्यापक तथा अनुसन्धानकर्तासँगको छलफललाई उनले भविष्यको ऊर्जा रणनीतिका लागि मार्गदर्शनको रूपमा लिएको बताए ।
नेपाल फर्किएपछि घिसिङले भ्रमणमा उठेका सुझावलाई आत्मसात गर्दै अभियानलाई अझ व्यवस्थित तरिकाले अघि बढाइने बताए । उनले प्रवासी नेपाली, विशेषगरी भूतपूर्व गोर्खा सैनिकका समस्या नजिकबाट बुझ्ने अवसर पाएको उल्लेख गर्दै उनीहरूको मागमा सधैं साथ र समर्थन रहने प्रतिबद्धता पनि जनाए ।
घिसिङले प्रवासी नेपाली समुदाय, राजदूतावास, महावाणिज्य दूतावास, संघ–संस्था र स्थानीय सहयोगीहरुप्रति विशेष धन्यवाद व्यक्त गर्दै “उज्यालो नेपाल”लाई सबै नेपालीको साझा सपना र अभियानका रूपमा अघि बढाइने बताए ।
प्रतिक्रिया दिनुहोस्